اتهمها بالزنا.. تفاصيل هجوم شيخ أزهري على ميار الببلاوي

حالة من الجدل أثيرت في الساعات الماضية، بعد هجوم الشيخ الأزهري محمد أبو بكر على الإعلامية ميار الببلاوي، واتهامها بالزنا بسبب تصريحاتها حول زواجها وطلاقها من نفس الشخص 11 مرة، الأمر الذي تسبب في دخول ميار الببلاوي في حالة انهيار وإغماء ودخولها للمستشفى.

هجوم محمد أبو بكر على ميار الببلاوي

وهاجم الشيخ محمد أبو بكر الفنانة والإعلامية ميار الببلاوي، عبر فيديو نشره على صفحته الرسمية على فيسبوك، وعلق على تصريحاتها مع الإعلامية بسمة وهبة في برنامج العرافة خلال موسم رمضان 2024، بأنها تزوجت 4 مرات ولكنها كانت ترجع دائماً لزوجها الأول ليصل عدد الطلاق بينهما 11 مرة.

وقال الشيخ محمد أبو بكر معلقاً على تصريحات ميار الببلاوي: "ماكنتش حابب أتكلم، لكن بعد أن تكلمت الأخت ميار الببلاوي عن أنها أطلقت من زوجها 11 مرة وكانت بترجع بمكالمة ولجأوا للمحلل، فهي أعادت للذاكرة فيلم عادل إمام اللي كان فيه دا، وبدأ الناس تتكلم".

وتابع قائلا: "والبعض بدأ يحتال على الشرع ويلجأ لهذه الطريقة، إبراء لذمتي، الإسلام بريء مما قالته ميار الببلاوي شكلا وموضوعا، كلامها لا يمت للدين بصلة، موضحًا: ربنا جعل الطلاق 3 مرات مش 11 مرة، وجعل المرة الثالثة حاسمة وفاصلة".

الشيخ محمد أبو بكر: زواج ميار الببلاوي باطل

واستكمل الشيخ محمد أبو بكر موضحاً حكم الشرع بالدين الإسلامي حول هذا الأمر، فقال: "هل ينفع لما يتطلقوا 3 مرات يرجعوا ويتفقوا مع واحد ويكتبوا على ورق؟ لا يمكن ذلك وهذا احتيال وزنا ولا يصلح".

وأضاف قائلا: "ولو اتجوزت وبيتت النية إنها تزهق الرجل دا علشان يطلقها فلا يصلح، النبي قال: لعن الله المحلل والمحلل له، يعني مطرودين من رحمة ربنا، يعني اللي اتجوزها باتفاق ملعون، واللي قاعد مستنيها ملعون من رحمة الله، وهناك لفظ معروف التيس وانتوا أكيد عارفين معني الكلمة إيه".

وأكد الشيخ محمد أبو بكر وفقاً بتصريحاته أن زواج الفنانة ميار الببلاوي باطل ولا يجوز، فقال: "الزواج والرجوع باطل يا ست ميار، والرجوع باطل يا ست ميار، ومعندناش طلاق في الإسلام اسمه 11 مرة، ومعندناش حاجة اسمها تحليل، لكن عندنا زواجاً شرعياً، إن عاش معها بالمعروف وألا يفارقها بالإحسان، ومعندناش حاجة اسمها ترجع بمكالمة تليفون".

انهيار ميار الببلاوي بعد تصريحات الشيخ محمد أبو بكر

ورداً على تصريحات الشيخ محمد أبو بكر، خرجت الإعلامية والفنانة ميار الببلاوي، في بث مباشر عبر صفحتها الرسمية على فيس بوك، وهي في حالة بكاء شديد وانهيار، للرد على اتهامه.

وأظهرت ميار الببلاوي عبر البث المباشر العقود الرسمية لزواجها وطلابها من أزواجها الأربع موضحة الفرق السنوات بين كل زيجة والأخرى، وأن هذا الأمر بنفي ما قيل عنها أنها تبيت النية مع كل زيجة للرجوع لزوجها الأول بمحلل.

وقالت ميار الببلاوى في بداية البث: "النهاردة حصل حاجة عمرى ما تخيلتها، أول ما خلصت الهواء صاحبتي كان عندها حاجة في قناة معينة، ومرضتش أسيبها لوحدها، وقلت هروح معاها وأسلم عليها، وأنا داخلة، أنا ورئيسة التحرير بتاعتي لقيت الشيخ الفاضل، وبحتسبه من الشيوخ الأجلاء".

وتابعت قائلة: "ولكن سبحان الله يمكن نزغ شيطان أو فتنة أو حديث نفس، ربنا بيقول (يا أيها الذين آمنوا إن جاءكم فاسق بنبأ فتبينوا)، فما بالكم إن اللي قال عني كده شيخ جليل ويخوض في عرضي وشرفي رغم أن كلنا بنحبه وبنسمع كلامه".

واستكملت ميار الببلاوى قائلة: "لما سمعت الفيديو، لقيته بيقول عليا إني باخد كل راجل ليلتين وإني ببوظ شكل الدعاة، حسبي الله ونعم الوكيل فيك زي ما اتكلمت في عرضي وشرفي وشرف ابني، حرام عليك، سبت التمثيل وكل حاجة وبشتغل في برنامجي وبين صلاتي وبيتي وتربية ابني ومش عايشة ومش بخرج من بيتي إلا لو شغلي يعني ادفن نفسي مع أمي!".

رد ميار الببلاوي على الشيخ محمد أبو بكر

وأوضحت ميار الببلاوى أن حياتها تغيرت بعد حلقتها الأخيرة مع الإعلامية بسمة وهبة في شهر رمضان الماضي، فقالت: "سيبكم من اللي حصل في الحلقة، لكن أي حد بيقول أي حاجة عادي بتعدي لكن ميار لو فتحت بقها الناس كلها تسن عليها السكاكين، ومحدش فكر أن ابني راجل، وابني في وسط الرجالة وصحابوا وشغله شكله هيكون إيه".

وتابعت قائلة: "ابني مش بيكلمني من 22 رمضان، من وقت ما الحلقة طلعت وقافل على نفسه اوضته ومش بيكلمني وانا ما طلعتش غير بابني، كمية المونتاج اللي معمولة في الحلقة فوق ما تتخيلوا، والحلقة اتذاعت وياما حاجات بتنزل وتعدي، ووقتها كنا في رمضان ومعنديش استعداد ابص لحاجة ولا اضيع صلاتي وأنا بخاف من ربنا بشكل مش طبيعي".

واستكملت وهي في حالة انهيار: "أنا شبعت ظلم ومحدش اتظلم قدي، والمشكلة أني كنت راضية باي حاجة وظلموتني في مليون موضوع وتوصل لحد شرفي وعرضي وشرف ابني وشيخ يقول أني زانية، أنا معايا ماجيستير في الفقة المقارن ودكتوراه وبرامج دينية وبحتسبها تكون عند ربنا وفي ميزان حساناتي".

وأضافت ميار الببلاوي: "وأنا أم رجل وزوجة رجل وست صعيدية حرام عليكيم قطعتوني، وإخواتي مبقوش يكلموني وابني مش بيمكلني وصاحبة القناة زعلانة مني، والدنيا مولعة عليا، بقول يا رب انا معملتش حاجة غلط ولو زي الستات اللي بتمشي في الحرام ماكنش اتجوزت على سنة الله ورسوله، حرام عليكم من عاب".

ميار الببلاوي: أنا مش عملا بدعة

وقالت أيضا في ختام بثها مع جمهورها على الصفحة:  "أعمامي بيصرخوا وبيقولو لي إيه اللي بيتقال عليكي ده، وبعد كده اللي هيتكلم عليا ولا على شرفي ولا جوزاتي مش هكست، أنا مش عاملة بدعة وكل المذيعات اللي زينا متجوزين أكتر من مرة وإحنا حياتنا غير الناس العادية، ومش سهلة، وفي ناس بتقرب علشان منبهرة ولما تقرب الانبهار بيروح، واحنا ولاد ناس وعيلة ومش جايين من الشارع، عمري ما عملت حرام ولا حاجة غلط، آخر مرة هتكلم ومالكوش دعوة بيا".

وقبل انتهاء البث المباشر تعرضت ميار الببلاوي للإعياء وطلبت من أحدهم دواء القلب، لتنهي بعد ذلك البث المباشر وتقوم بحذفه من صفحتها، وتنشر بعد ذلك منشورا قالت فيه "أهم لايف في حياتي كله"، وينتشر بعد ذلك صورا لها في المستشفى وهي تتلقى العلاج بعد تعرضها لأزمة صحية بسبب انفعالها الشديد.