بعد جدل تكريمه من الجامعة البريطانية.. كزبرة: أنا اجتهدت

حالة من الجدل سيطرت على نشطاء مواقع التواصل الاجتماعي، بعد تداول صور تكريم مطرب المهرجانات كزبرة من قبل الجامعة البريطانية في مصر.

 تكريم كزبرة من الجامعة البريطانية

وشارك مطرب المهرجانات كزبرة إعادة نشر منشور لأحد الأشخاص الذين ينتقدون تكريمه من الجامعة البريطانية، والذي كتب قائلا: "لما تشوف الفنان كزبرة بيتكرم من الجامعة البريطانية.. هتفهم ليه بتستلم شهادة التخرج بتاعتك مبرومة!".

ليرد كزبرة قائلا: "البوست ده في ناس كتير عملاه شير عليه وزعلانين إني بتكرم.. ومش حابين إني أتكرم وإن في ناس أكتر مني تستحق، أولا أنا أقل خلق الله وفعلا في ناس أكتر مني بكتير تستحق".

وتابع قائلا: "بس أنا مش عايزك تحكم عليا من بعيد أو إن أنا شخص تريند وجت معايا صدفة لا أنا راجل اجتهدت وتعبت واتظلمت كتير أوي ومكنتش بيأس وكنت حاطط ربنا طول الوقت قدام عنيا".

كزبرة: لكل مجتهد نصيب

واستكمل كزبرة قائلا: "وكنت عارف إن هيجي يوم وربنا هيفرجها وهيعوضني، والحمدلله حصل ورضي ربنا عليا كان أكثر ما كنت أتوقع، وفعلا لكل مجتهد نصيب وأنا أجتهد في ليه في ناس مستكتره عليا الفرحة وطول الوقت شايفين إني شخص مستهلش".

وأضاف كزبرة: "أي حاجة عامةً ربنا يسامح أي حد بيقول عليا كلمة مش صح وربنا يدي كل واحد على قد نيته وإن شاء الله الفترة الجاية هتكرم في كل أنحاء العالم، وبس نصيحة مني لكل بنادم فاضي ومركز مع غيره أتمنى تركز مع نفسك وفي شغلك وحب الخير لغيرك وصدقني محدش هياخد رزقك بس أنت أجتهد وحب عملك وأرضى بالمكتوب".

  كزبرة في مسلسل كوبرا

الجدير بالذكر أن مطرب المهرجانات كزبرة يشارك في موسم دراما رمضان 2024، لأول مرة من خلال مسلسل "كوبرا" والذي يذاع في النصف الثاني من رمضان ضمن المسلسلات المصرية.

مسلسل كوبرا من بطولة كل من محمد عادل إمام ومنة فضالي ومجدي كامل وكزبرة ومحمود البزاوي وهشام إسماعيل وأوس أوس وعلاء مرسي ودينا ماهر والعمل من إخراج أحمد شفيق وتأليف أحمد محمود أبو اليزيد وأحمد دعية.