وفاء عامر تثير الجدل: بغسل رجل جوزي وبتوع حقوق المرأة بيخربوا البيوت

كشفت الفنانة وفاء عامر تفاصيل كثيرة عن علاقتها بزوجها محمد فوزي وطريقة حياتهما، كما تطرقت إلى تفاصيل علاقتها مع شقيقتها آيتن عامر.

وقالت وفاء عامر خلال لقائها ببرنامج "قعدة ستات" مع الإعلامية مروة صبري على قناة اليوم: "لما برجع من الشغل للبيت، بغسل رجل جوزي، لما ألاقيه تعبان هو مش بيطلب، كفاية أنه عامل الحلم اللي بحلم بيه ومحقق ليا السعادة".

وتابعت قائلة: "هو مش بيقبل حد يحرجني أو أنه ياخد حقي أو حد يدوس على كرامتي أو يقلل من قيمتي، ودائما رأيه صائب، علشان كدا معنديش مشكلة اغسل رجليه".

وفاء عامر: طاعة الزوج موجودة في الأديان كلها.

واستكملت وفاء عامر قائلة: "بتوع حقوق المرأة عايزين يخربوا البيوت الزوجة من واجباتها أنها تعمل أي حاجة مع جوزها، أما الحقوقيون يطالبوا أن الست متخدمش ولا تسعد زوجها ولا تحافظ على بيتها وأسرتها".

ووجهت "وفاء" رسالة لمنظمات حقوق المرأة: "في أشياء كثيرة منها الحفاظ على كرامة الست من خلال أن تقفوا في ظهرها أن محدش يجرحها بكلمة ولا يأخذ حقها".

وأشارت وفاء أن كافة الأديان السماوية حثت المرأة على طاعة زوجها في حدود المعاملة الطيبة والأخلاق، وأن علاقتهم تكون بعيدة عن الخلافات والجدال والندية في التعامل.

وفاء عامر: اللي عنده ورق أن أيتن بنتي يطلعه

كما تطرقت الفنانة وفاء عامر خلال لقائها مع الإعلامية مروة صبري إلى علاقتها مع شقيقتها الفنانة أيتن عامر وقالت: "هي تعمل ليا حساباً لأنها تخاف من قراراتي، وبترجع دائما ليا في كل حاجة، لأن اللي ملوش كبير يشتريله كبير".

وتابعت قائلة: "أيتن  بتاخد رأيي في مواضيع كتير أوي وهي عارفة إنها ترجع ليا علشان تأخذ رأي في أي موضوع، وبتقولي انتي عندك حق، بعد ما بتعاند مع بعض في الأول".

وعن الإشاعة التي دارت حول أن أيتن عامر ابنتها وليست شقيقتها قالت: "يا ريتها كانت بنتي دي أمنية حياتي يكون عندي بنت، ولكن أيتن مش بنتي واللي عنده ورق يطلعها، أنا واثقة من نفسي وعارفة إني مش بيعمل حاجة غلط واللي عايز يصدق هو حر".