عمر كمال يعترف بعلاقته مع ندى الكامل: دخلت في متاهة وفوقت

أثار مطرب المهرجانات عمر كمال الجدل خلال الساعات الماضية، بعد أن اعترف لأول مرة علنا بعلاقته الغرامية مع ندى الكامل طليقة الفنان أحمد الفيشاوي منذ أكثر من عام.

تصريحات عمر كمال عن ندى الكامل

وفي تصريحات حصرية لبرنامج "خلاصة الكلام" على قناة النهار، كشف الفنان عمر كمال عن تفاصيل علاقته العاطفية السابقة مع ندى الكامل، وأسباب الانفصال.

وأعرب عمر كمال عن استيائه من تسريب تفاصيل حياته الخاصة، مشيرًا إلى أن العلاقة لم تلق استحسانًا من الجمهور، فيقول: "أنا مبحبش اتعرف بموضوع عاطفي أو شخصي، وزعلت لما علاقتي أتعرفت لأن مردودها عند الناس لم يكن جيد، ومش عارف الناس شافت الموضوع ازاي".

وتحدث عمر كمال عن فترة عدم استقراره النفسي، حيث كان يعتمد على الأدوية والمهدئات للنوم، مما أثر على سلوكه وذاكرته، فقال: "أنا في الفترة دي لم أكن متزن نفسيًا ولم أستطع النوم إلا بأدوية ومهدئات، وسلوكياتي لم تكن منضبطة، والأدوية كانت مأثرة عليا لدرجة أن ممكن حد ياخد مني مبلغ مالي وأنسى خالص".

وتابع قائلاً: "وكنت بأخذ الأدوية دي بدون علم من ناس وصفت لي ودخلت في متاهة، والموضوع قلب معايا بهلوسة، ومرة مدير أعمالي راح جابني من على الدائري وأنا خابط العربية، وتاني يوم معرفتش أني عملت كده، والسنة والنص دي أثرت على شغلي".

عمر كمال: تجربتي مع ندى الكامل ضرتني

أشار عمر كمال إلى أن العلاقة كانت لها تأثير سلبي أكبر من الإيجابي، وأنه اتخذ قرار الانفصال بنفسه، وأضاف أنه رغم مشاعر الحب التي كانت تجمعهما، إلا أن التجربة كانت ضارة بالنسبة له.

فيقول عن علاقته بندي كامل: "ممكن الغلط يكون من عندي لأني عملت في نفسي كده، هي مكانتش فاتحة خير عليا والمفروض الإنسانة اللي معايا لما تلاقيني بميل ناحية الغلط متميلش معايا لأ تعدلني، تجربة مكانتش حلوة عليا، السلبي فيها أكتر من الإيجابي، وأنا اللي خدت قرار الانفصال لأني كنت بقع ومش نفسي، أنا حبيتها أكيد ولكن التجربة ضرتني".

عمر كمال: عصيت ربنا وفوقت

وأكد عمر كمال على دور الإيمان في حياته، معتبرًا أن الله كان دائمًا يدعمه في الأوقات الصعبة، وأضاف موضحاً: "ربنا حبيبي، وفي كل موقف في حياتي كنت هقع فيه شالني، وربنا وقف معايا ممكن يكون علشان أمي أو أخواتي أو خير بعمله أو علشان براعي ربنا في فرقتي، أنا دايمًا بصحي نفسي ودايمًا عندي النفس اللوامة، وطول ما أنا بدخل ربنا في طرف الميزان همشي كويس".

واستكمل عمر كمال قائلا: "ممكن أكون في علاقة وعصيت ربنا، فربنا يديني قلم ويكسرني علشان يسمع صوتي، وأنا فوقت وحاولت ترجعني وأول ما أتأكدت أني مش راجع شوفت الوش التاني".

وأضاف: "وناس تانية ظهرت، طب ده أنا قرأت دراسة بتقول إن الشخص الطبيعي السوي العادي علشان يطلع من علاقة ويستشفى منها عايز 6 شهور، وبدأ ربنا يبين ليا حكمته وأن قراري صح".

وأخيرا قال عن علاقته بندى الكامل: "ده أنتي لو عندك جاكيت ولبستيه في مناسبة يصعب عليكي تشحتيه، ولو عندي عربية بتصعب عليا وبحن لها، وتأكدت أن قراري كان صح وفوقت والدنيا بقت أحلى كتير".