مها أحمد ترد على مهاجمي ظهورها على "التيك توك": علشان مش بشتغل في الفن

تصدرت الفنانة مها أحمد محركات البحث الساعات الماضية، بعد تداول نشطاء مواقع التواصل الاجتماعي عدد من فيديوهات البث المباشر لها على موقع "التيك توك"، خاصة البث الذي وجهت فيه الإهانات لكل المعارضين ووصفتهم بالخادمات.

وخرجت مها أحمد في مقطع بث مباشر على التيك توك، لترد على حملة الهجوم ضدها، وكان من ضمن المهاجمين الفنان هادي خفاجة الذي شاركها في بث مباشر من قبل.

وقالت مها أحمد في مقطع الفيديو الذي ظهرت فيه على صفحتها الرسمية على موقع "التيك توك"، :"إحنا بنطلع عشان مبنشتغلش، في الوسط مبنشتغلش ولقينا مجال زي السوشيال ميديا، ولو أنا مثلًا بعمل مسرح ولو فيه عائلة سعودية أو كويتية بيجيبولي هدايا، وعندي أصدقاء يمنيين بيجبولي فضة وبقبل الهدايا".

وتابعت مها أحمد: "فهل أقبل الهدايا وأنا في المسرح أو السينما ومش هقبلها على اللايف؟ لا هقبلها، أنا حرة ومحدش له حاجة عندي، خلاصة الموضوع، إحنا داخلين على التيك توك عشان نشتغل، أنا واحدة ماضية عقد مع تيك توك وتبع إدارة التيك توك".

وتابعت الفنانة المصرية: "أنا موظفة وبشتغل ولازم أشوف شغلي وأكل عيشي وبفكر الناس بيا والـ CV بتاعي وإني فنانة وموجودة حتى لو ماليش أعمال دلوقتي"..

واختارت مها أحمد من خلال مقطع البث المباشر أن توجهه رسالة لأحد الأشخاص دون أن تذكر اسمه وقالت:"الواحد هيرجع وأقول ربنا يشفي كل مبتلى أو مريض، قلة الدعم بتجيب حالة مش طبيعية وكلنا بنكتئب، فيه واحد بيعبر عن حاله ويطلع لايف ويبقى تريند".

وأضافت: "يعني فيه واحد ما من ضمن الناس المدمنة طلب مني نتخانق مع بعض عشان يطلع تريند، رغم إنه عمل حاجة وطلع بيها تريند وكسب تعاطف الناس، قولتله عيب مش للدرجة دي، أنا مش من الناس اللي ممكن تطلع تريند عشان خناقة مع حد أنا تريند لوحدي".

وقالت مها أحمد: "كل حد بيستخدمني عشان يطلع تريند هو حر، وإنك تقعد في اللايف والناس تشتمك بس تخلي الواحد حالته النفسية مش كويسة ويتصاب بالهلع والرغي واللت والعجن وشتايم الناس وإني أسخر الأدمن اللي عندي يسجلوا كل اللايفات، ليه يعني؟".

آخر أخبار مها أحمد

جدير بالذكر أن آخر عمل شاركت فيه الفنانة مها أحمد هو مسلسل بيت الشدة الذي عرض العام الماضي 2022، مع الفنانة وفاء عامر والمخرج وسام المدني والمؤلف ماجي عبدالله.

كما شاركت مها أحمد مؤخرا في الوقفة التضامنية التي نظمتها نقابة المهن التمثيلية للتضامن مع الشعب الفلسطيني وإدانة العدوان الإسرائيلي على غزة.