سامح حسين: أنا مين علشان عادل إمام يزعل مني.. ولو زعل مني ده شرف ليا

أشاد الفنان سامح حسين بالنجم عادل إمام ووصفه بأنه "مدرسة"، يتمنى أن يعمل بها في يوم من الأيام.

وأوضح سامح حسين في أثناء لقائه مع الإعلامي عبد العزيز أحمد في برنامج "مساء الإمارات"، والمذاع على قناة الظفرة: "عادل إمام مدرسة ونفسي اشتغل معاه وهو قيمة كبيرة وبيثقل المهنة".

وعن اعتذاره عن العمل في مسلسل "فلانتينو" قال الفنان سامح حسين: "مكنتش فرصة لأن الفرصة إني أشتغل مع قيمة كبيرة حتى لو دوراً صغير وإني استفيد بوجودي معاه وكل حاجة ليها ظروفها وأنا بحب أبقى مبسوط مش مجبر وهو مزعلش مني وأنا مين علشان يزعل مني ولو زعل مني ده شرف ليا".

كما تحدث الفنان سامح حسين عن الفنان الراحل سمير غانم وقال: "سمير غانم هو رسول الضحك وكان ليا الشرف أني اشتغلت معاه في مسلسل كان ضيف شرف فيه وموافقته أنه يشترك في المسلسل ده شرف لينا ورسالة أن الشخص مهما كبر بيجي يساعد الأجيال الجديدة وأتمنى اشتغل مع دنيا سمير غانم هي بتجيد كل الأدوار وموهبة خطيرة".

وأكد الفنان القدير أنه بعد زواجه قرر أن يركز في اختياراته للأعمال حتى يكون نموذج لبناته وقال: "لما اتجوزت وقلت هكون أسرة حسيت إني لازم أبقى قدوة ومش عايز بناتي يشوفوا حاجة مؤذية ليا أو ليهم".

سامح حسين وراجل وست ستات

وتحدث الفنان سامح حسين عن دوره في مسلسل راجل وست ستات الذي أحدث نقلة في مسيرته الفنية وقال: "رمزي في راجل وست ستات هو اللي عرفني على الناس رغم أن كان عندي محاولات قبل كده بس ده اللي انتشر، التيم كله من ورشة الكتابة والمخرج والثنائي اللي قدمناه أنا وأستاذ أشرف كانوا شبه لوريل وهاردي الاتنين كانوا أغبى من بعض وكان بيشرح حاجات غلط".

وأضاف الفنان القدير: "احنا اشتغلنا 7 مواسم وكل موسم 34 حلقة وأنا في الأول كنت بقوله عادل وأنا بشتغل على الورق كتير فاقترحت أني أقوله "دولة حبيبي" كل ما يزعقلي لأنها هتبقى الطف".

وعن إمكانية تقديم شخصية "رمزي" في عمل منفصل قال سامح حسين:"مفكرتش أقدم شخصية رمزي لوحده ولكن لو اتعمل تاني المسلسل هشارك فيه".

وأشاد بالعمل مع النجم أشرف عبد الباقي وقال: "أشرف عبد الباقي كان متسامحاً جدا لأن في حلقات رمزي كان بيضحك أكتر وكان في حب وتفاهم في فريق العمل".

سامح حسين وزوجته

كما تطرق سامح حسين خلال اللقاء وتحدث عن تجربة العمل مع زوجته وقال: "أنا راضي عن أفلامي في السينما جدا وإلا مكنتش هقدمها وأكتر فيلم بحبه هو "عيش حياتك" لأن ده تأليف مراتي وهي دارسة دراما وبتقرا كتير والفيلم عن تجارب حقيقية روحناها سوا والفيلم صورة مشرفة للبلد لأن أي حد عنده انتماء للبلد بيشتغل بسلاحه وانا سلاحي الفن".

وأشاد بزوجته قائلا: "مراتي هي حياتي وهي شايلة مسؤوليتنا ومتطلبات البيت وهي ست بيت هايلة وبرة البيت مشرفة وبنعمل مسلسلاً وفيلماً حاليا من تأليفها".