هزقني على التليفون..باسم يوسف يروي تفاصيل مكالمة مع الزعيم عادل إمام

كشف الإعلامي والكوميديان باسم يوسف تفاصيل لقائه الأول مع الزعيم عادل إمام مكالمته له بعد إيقاف برنامجه، وذلك بعد إعلان رامي إمام اعتزال والده الفن والتفرغ لأسرته.

قصة لقاء باسم يوسف وعادل إمام

وقال باسم يوسف خلال فيديو نشره على صفحته الرسمية على الفيس بوك إنه التقى عادل إمام لأول مرة في حفل تكريمه بمناسبة فوزه بمسابقة الأكثر تأثيرًا في العالم، والتي أقيمت في قناة cbc وقال: "بمناسبة تكريم الزعيم عادل إمام في مهرجان جوي أواردز وبمناسبة برضه خبر اعتزاله الفن عندي قصة صغيرة عايز أحكيها مع الأستاذ عادل إمام".

وتابع قائلا: "أنا أول مرة قابلت الأستاذ عادل إمام كان لما كنت كسبت بمسابقة الأكثر تأثيرًا عن برنامجي البرنامج سنة 2012 وكنت وقتها لسه في cbc وعملولي حفلة وكان في ناس كتير وقابلت أستاذ عادل وكان لطيف جدًا وقابلت كمان سمير غانم الله يرحمه وكانت ليلة جميلة جدًا وكان معايا وقتها والدتي ووالدي الله يرحمهم ووقتها والدتي قالتلي مدتيش الأمان لحد الناس دي هتتقلب كان عندها نظرة".

وأضاف باسم يوسف: "كانت حاجة تاخد العقل إني أشوف قدامي عادل إمام وسمير غانم وهم مبسوطين بالبرنامج، وفي وجود عادل إمام الراجل لما كان بيتكلم محدش كان بيتكلم الراحل كاريزما رهيبة ودمه خفيف جداً المهم أخذنا أرقام تليفونات بعض".

مكالمة عادل إمام لباسم يوسف

وكشف باسم يوسف عن تفاصيل مكالمته مع الزعيم عادل إمام قائلا: "جه بعد كده الحلقة اللي اتمنعت بعديها على قناة cbc وهي الخلقة رقم واحد بالموسم الجديد، وكنت مسلم وقتها الحلقة الثانية التى لم تذاع، أنا كنت صورت الخلقة وسافرت أبو ظبي ووقت إذاعة البرنامج كنت أتمشى لأني لا أحب أشاهد نفسي في التليفزيون ولم أكن أعرف أن البرنامج أتوقف ولم يتم إذاعة الحلقة الثانية من الموسم الجديد".

وأضاف باسم يوسف قائلا: "لقيت كمية مكالمات كثيرة على تليفوني ومهتمتش لان بيكون وقت إذاعة الحلقة في ناس كثير بتتصل، وفجأة لقيت تليفوني بيرن أستاذ عادل إمام قالي إيه يا باسم اللي بيحصل ده ولقيته بيزعقلي وقالي البرنامج فين؟ الحلقة ما تذاعتش، قلت له والله أنا سلمت الحلقة".

وتابع: "هو كان متضايق إن البرنامج إزاي مايتذعش وبعدها عرفت إن الحلقة اتمنعت والبيان اللي طلع وبعدها لقيت أخويا بيكلمني قولتله بقولك إيه عادل إمام لسه مهزقني أنا مش ناقص، ونسينا البرنامج وقعدنا أنا وأخويا نتكلم على مكالمة عادل إمام".

وختم باسم يوسف حديثه بتوجيه التحية للزعيم عادل إمام، ومدحه بأنه "جزء كبير من تاريخ مصر"، وأن "ناس كتير عارفين مصر من خلاله"، وأنه "ممكن تختلف مع عادل إمام تحب فنه متحبوش لكن هو تاريخ".

وأعرب باسم يوسف عن احترامه وتقديره له، وقال إنه "هفضل طول عمري فاكر المكالمة دي والتهزيقة دي اللي اتعملت بحب طبعًا".